Kɛ' ‑blaa 'de Kea 'a 'sraadɛ 'ɛ ‑tɩ' 'ʋn
22
Kea wluɛ 'de Moisɩ ‑pee ɛ 'na: 2 ‑Ɩn -tmʋʋ' Aarɔn ke ɔɔ' "nynuu 'de Israɛ ‑nyʋ 'a 'sraa dɩ -ɩ -pʋn" ʋʋ 'jea kɩɩn tɛɛn 'a ‑tɩ' 'ʋn, ‑bo ɛ nɩ 'kan a ‑wɛe ʋʋ je 'ma 'nynɩ ‑kwɛai ‑flɛn" kpʋʋn‑. 'Mɔ ‑nɩ Nyɔsoa.3 ‑Ɩn -tmʋʋ' ʋʋpʋ: Aoa' "nynuu 'a "nynuu ‑ʋʋa mua 'wlʋa 'de aopʋ 'de ɛ, ‑bo jrɔ' kpʋn ‑flɛn'' ‑wɛe ɔ 'je 'ma 'sraadɛ Israɛ -nyʋ ‑teea kpɔi" ‑pʋn" 'kpa a, nyʋ 'jeɔ 'ʋn "juɛi ‑sa ‑o. 'Mɔ ‑nɩ Nyɔsoa.
4 Aarɔn ɔ' "ji jrɔ' 'wɛ nɩa 'e ku ‑pun" ‑ɛɛ -boa 'dewlɛ ‑tɔo nɩa ‑pʋn" se 'sraadɛ dii mamaʋ 'sʋ ‑bo ɔ se i -kwɛ ɛ. Kɛ' due' ‑nɩa 'mʋʋa‑ mɛ ‑nɩ 'e nyʋ bla nyɔ -sea i -kwɛ "i, dɛ-nʋɛ ɔ bla "ku "i ke nyʋ "junmɔu ni 'a 'wlʋa 'ʋn a ‑tɩ' 'ʋn, 5 nyɔ -kpʋan -flɛn" dɛ‑nʋɛ' ɔ bla nmi mɩɩ" ɩ kpʋan ‑flɛn" "i, 'dewlɛ nyɔ kpʋan ‑flɛn" dɛ‑nʋɛ' mɛ -nɩ ɔ bla dɛ "o dɛ -kpʋan -flɛn" -ɛɛ kpʋn a nyʋ -flɛn" "i. 6 Nyɔ ‑ɔɔ mua ɩa' dɩ tu "i blaa' ɔɔ mua ‑flɛn" kpʋn 'a mamaʋ 'sʋ kwie 'je kpʋn, ɔ se 'sraadɩ -tea kpɔ "i dii -bo ɔ se jre 'de "ni o ɛ. 7 ‑Bo 'jrʋ blui ɛ, ‑mɛ ɔɔ mua i ‑kwɛa', 'sʋ ɔ bɛɛ‑ ɔ 'je 'sraadɩ di, dɛ dɛ‑nʋɛ' mɛ ‑nɩ ɔɔ' diiɛ ‑o. 8 Ɔ se nmi ‑mɛa "cɛ 'dewlɛ dɛ kpʋʋndɛ 'faea i dii, ɛɛ muɔ ‑flɛn" kpʋʋn a. 'Mɔ ‑nɩ Nyɔsoa.
9 'Sraa ‑saʋn ‑wee' "klein 'je 'ma kɛ' ‑nɩ wɔnje' ‑o ‑wɛe ʋʋ je ʋʋa' ‑cɛ" dɛsaʋn "jru ‑te' 'de ʋʋa' diidɛ ɛ -tɩ' 'ʋn ɛ je 'kan nɩ ʋʋa' diɛ -tea Kea 'a -tea' blʋɔ blaa' je nʋ ʋʋ je 'mɛ. 'Mɔ Nyɔsoa, mɔ ‑ɔɔ ‑kwɛɛ ʋʋpʋ i.
10 Nyʋ ‑sea 'sraa -saʋn nɩ se 'sraa dɛ jrɛ' dii, 'dʋɩ o nyʋ ‑a nʋa 'sraa ‑sai 'a dbo ‑wɛe ɔɔ ‑sa ‑kei" ‑mʋ 'a ‑cɛ" seɛ dii. 11 'Bo ‑mɛ 'de ɛ, ‑bo nyɔ 'sraa ‑sai nʋa 'wɛi ‑wɛe ɔ ‑tɩn' a, 'dewlɛ ‑bo ɔ 'wlʋ 'de ɔ o ‑gbu" di ɛ ‑mɔ bɛɛ' ɔ 'jeɛ di. 12 'Sraa ‑sai 'a 'nynɔkpaoju ‑ʋ ‑tia" nyɔ deejrɔ' ‑sea 'de 'sraa ‑saʋn "klu 'wlʋ "bli ɛ, seɛ 'bɛɛ ʋ 'je dɩ nyʋ ‑sae' 'sraa ‑sadɩ "kpei mɔ di ‑wee'‑. 13 'Kaa ‑bo ʋ 'kpa ‑teɔn" 'nynɔ 'dewlɛ ‑bo ʋʋ ‑sʋ 'kwla ‑wɛe ʋ se "ju 'ble ɛ, 'de ʋʋ 'je ʋʋa' "bo 'a ‑gbu" ‑sɔn de ji ka ʋ nɩa 'nyɩa kpae" ɛ, ‑mɛ ʋ bɛɛ' ʋ 'je ʋ "bo 'a diiɛ di. 'Kaa nyɔ sea 'sraa -sai nɩ seɛ dii.
14 ‑Bo nyɔ jrɔ' se 'sraadɛ juo ‑wɛe ɔ 'jeɛ di ɛ, ɔɔ muɛ ‑kɔo pooa' -bo nyʋ -seeɛ 'ʋn kpɛ -mm", -mɛ ɛɛ due' mɛ ɔ 'jeɛ "kpei -te'.
15 'Sraa ‑saʋn se Israɛ -nyʋ 'a 'sraa dɩ ʋʋ ‑teea kpɔi" ‑wɛe ʋʋ "nyɩa Nyɔsoa 'blʋɔ blaa i. 16 ‑Bo 'sraa -saʋn a sɩ di ɛ, ‑mɛ ʋʋa' ‑teɛ' ʋʋa' 'cɛ ‑kao "jru, dɛsaʋn -nɩa 'mʋa- 'a ‑kɔi" 'je nmae, dɛ‑nʋɛ' 'mɔ Nyɔsoa ‑ɔɔ ‑te' ʋʋpʋ kpɔi".
'Sraadɩ nyɔ 'bɛea ɔ 'jea kpʋn ɛ
17 Kea wluɛ 'de Moisɩ ‑pee ka: 18 ‑Ɩn ‑wlu 'de Aarɔn o, ɔɔ' "nynuu ke Israɛ -nyʋ ‑pee ‑ɩn ‑na: Nyɔ "oo nyɔ, Israɛ -nyʋ ke 'dʋɩ -jia' 'de aopʋ "klu ‑tea', ‑ɔ -nɩɛ "i -ɔ -je 'sraa nyɔ "nyɩa Nyɔsoa -wɛe ‑ɛ ‑wee' nɛ dia -sa, ‑bo ɛ nɩ wlu ɔ cɛan -tie" 'a ‑tɩ' 'ʋn, 'dewlɛ -bo ɔ ‑te' tɔ', 19 dɛ ɔ 'jea ja 'de ɔɔ' 'sraa 'jea kpʋʋn ɛ, bli beɔ o 'blae ‑gblɔ ɛ ke gbao ju ‑kɔ sea ‑pʋn" nɩ ɛ. 20 ‑Ɩn se nmi ‑nɛɛa 'sraa 'ʋn ‑saa i, 'de ɛɛ' ‑tɩ' 'ʋn ɛ ‑ma 'sraa dɛ se kpʋʋn ɛ i. 21 'Kamɔ ɛ nɩ ‑ke, ‑bo nyɔ jrɔ' ‑sa wlu "kpei ‑sea' sraa ɔ 'je 'ʋn "nyɩ 'de ɔɔ' "nɔdɩ klae" ke mɩɩ" "klu, ‑bo ɔ cɛn wlu -tie" nɩ "i 'dewlɛ ‑bo ɔ ‑te' tɔ', ‑bo ɔ nɩɛ "i ɔɔ' 'sraadɛ 'je kpʋʋn ɛ ‑mɛ 'sraadɛ ‑kɔ sea ‑pʋn" nɩ mɛ ɔ 'e ja. 22 "Nɔdɛ- ‑ɛɛ "jri wa, -jɛ ‑ɛ ‑nɛɛa, ‑jɛ ʋʋ 'cɛan 'dao- "i 'dewlɛ pluun" nɩa ‑pʋn", "cruu dia, srɩɩn dia, ao seɛ 'sraa ‑ɛ ‑wee' nɛ dia ‑sai ao seɛ Nyɔsoa "nyɩ i. 23 ‑Bo bli 'dewlɛ 'blae ju jrɛ' ɛɛ' 'dao- jrɛ' tɛn i 'dewlɛ jrɛ' "kɔan i, ‑ɩn -bɛɛ' ‑ɩn ‑jeɛ dɛkwai ‑sa 'sraa 'ʋn nʋ, 'kaa ɛɛ' nmi tu se kpʋʋn ɛ i 'de wlu ‑tie" cɛn 'sraa 'a ‑tɩ' 'ʋn. 24 "Nɔdɛ- ‑ɛɛ mlɩ waa i, ‑ɩ ‑nʋʋa 'pɔo, nyʋ ‑sae' 'dewlɛ nyʋ cɛan 'e, ɛ seɛ bɛɛ- ɛ 'je 'sraa 'ʋn ‑saa ɛ 'je Ke Nyɔsoa "nyɩ, ao se 'kan nʋɩ ‑bo ao nɩ 'de aoa' 'blʋa di ɛ. 25 Ao se ɩa' "nɔdɩ tu mɔ kpʋn i ‑wee' 'de 'dʋɩ 'kwa ‑wɛe ao seɛ 'sraadɛ 'ʋn nʋʋɩ ao se aoa' Kea "nyɩ i, ‑jɛ nyʋ ‑sa dɛ jrɛ' 'de ɛ ‑pʋn" -mɛ ɛ nɛɛa', ‑mɛ 'ɩn seɛ kpʋn i.
26 Nyɔsoa wluɛ 'e Moisɩ ‑pee ka: 27 ‑Bo bli ju, 'blae ju 'dewlɛ gbao ju 'wlʋɛ, ɛɛ muɛ ɛ de ‑pʋn" sia' 'de 'wɩ ‑mɛ" 'sɔn 'di, 'de ɛɛ' 'wɩ ‑mɛ" na ‑nɛ "kpei ɛ, ɛ 'bɛɛ ɛ 'je 'sraadɛ ‑ɛ ‑wee' nɛ dia nʋ ‑wɛe Kea 'jeɛ kpʋn. 28 'Kaa ao se bli' nynɔ o 'blae nynɔ o gbao nynɔ ke ɛɛ' "ju 'sraa 'ʋn ‑sa i 'de 'wɩ due' 'di. 29 ‑Bo ao ‑sa Nyɔsoa 'sɛpo 'sraa a, ‑mɛ ao nʋɛ ka ɛ 'jea kpʋɛn-.
30 Ɛɛ muɛ dia' 'de 'wɩ ‑ɛɛ 'di ʋʋ ‑sa ɛɛ' 'sraa tu-, ao se ɛɛ' jrɛ' 'e sie i ‑sɔn' seɛ "kpei ‑sɩɩn i. 'Mɔ ‑nɩ Nyɔsoa.
31 Aoa muɛ 'ma kɛ' wɔn 'jea ‑wɛe kɩ "sia 'nynɩ ao 'je 'kan nʋ. 'Mɔ ‑nɩ Nyɔsoa.